شبكة بيت الذاكرة الفلسطينية



 
الرئيسيةالرئيسية  س .و .جس .و .ج  بحـثبحـث  الأعضاءالأعضاء  التسجيلالتسجيل  دخولدخول  
عدد زوار المنتدى
.: عدد زوار المنتدى :.

المواضيع الأخيرة
» لماذا كان رسول الله صلى الله عليه وسلم يُكثر من الصيام في شهر شعبان
الأحد 15 مايو 2016, 8:53 pm من طرف قلوب دافئه

» لماذا عُرج برسول الله من المسجد الأقصى ولم يُعرج به من المسجد الحرام
الأربعاء 16 مارس 2016, 12:33 am من طرف قلوب دافئه

» الاحتفال بمولد رسول الله صلى الله عليه وسلم
الأحد 20 ديسمبر 2015, 1:06 am من طرف قلوب دافئه

» ضرب الأطفال
الأربعاء 25 نوفمبر 2015, 9:03 am من طرف قلوب دافئه

» الأدب فى رياض الصالحين
الإثنين 19 أكتوبر 2015, 11:13 am من طرف قلوب دافئه

» الصبر والأمانة باب القرب والعطاء
السبت 12 سبتمبر 2015, 3:54 pm من طرف قلوب دافئه

» إصلاح وتربية المجتمع بإصلاح قلوب أهله
الإثنين 17 أغسطس 2015, 11:23 pm من طرف قلوب دافئه

» احكام الفدية على المريض فى رمضان ومتى تجب عليه
الأحد 21 يونيو 2015, 12:04 am من طرف قلوب دافئه

» رؤية هلال رمضان
الإثنين 08 يونيو 2015, 4:46 pm من طرف قلوب دافئه

» ولم يك رب العرش فوق سمائه تنزّة عن كيف وعن برهان
الثلاثاء 02 يونيو 2015, 12:02 pm من طرف المحب لفلسطين

» لماذا عرج برسول الله صلى الله عليه وسلم من المسجد الأقصى ولم يعرج به من المسجد الحرام
الثلاثاء 26 مايو 2015, 10:05 am من طرف قلوب دافئه

» لماذا طلب داعى اليهود والنصارى وإبليس نظره من رسول الله فى الإسراء والمعراج
السبت 16 مايو 2015, 8:27 am من طرف قلوب دافئه

» لماذا اختص الله رسوله صلى الله عليه وسلم بالإسراء والمعراج دون باقى الأنبياء
الإثنين 04 مايو 2015, 6:26 am من طرف قلوب دافئه

» تحميل كتاب إشراقات الإسراء
الخميس 16 أبريل 2015, 12:30 am من طرف قلوب دافئه

» اختبار الغضب
الأحد 29 مارس 2015, 1:50 pm من طرف قلوب دافئه

لن ننساكم
المتواجدون الآن ؟
ككل هناك 13 عُضو متصل حالياً :: 0 عضو مُسجل, 0 عُضو مُختفي و 13 زائر

لا أحد

أكبر عدد للأعضاء المتواجدين في هذا المنتدى في نفس الوقت كان 689 بتاريخ الجمعة 21 يونيو 2013, 9:15 pm


شاطر | 
 

 يرحم ايام زمان أكبرنا مساحه خاصه ل ستي وستك

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: يرحم ايام زمان أكبرنا مساحه خاصه ل ستي وستك    الأحد 14 أغسطس 2011, 7:51 pm



حكايات من ستي وستك


هي حكاية ستي وستك خطرت في بالي وأكيد حثبتها كرمال عيون ستي


مساحة خاصه بزمن راح وما عاد رجع مساحه خاصه بلهجة فلسطينية اصيله غير مصطنعه


حكايات بنسمعها كتير ع لسان ستي وستك


ولأني بحب بلدي كتيييييييييير ... حبيت ادرجلكم هاد الموضوع




ومعا يدا بيدا لاحياء تراث بلادنا من القصص المحكية

تابعوني وأكيد ما رح تخسروا اي اشي ....



الزمان : في يوم من الأيام .
المكان : في المتحف الشعبي .
المناسبة : الحنين إلى الماضي ، إلى الحياة بلا زيف أو رتوش .في يوم من الأيام ،
بعد ما شبعنا وحسينا بالترف والتخمة ،
وصرنا نتمرمغ في النعمه ، وصارت الحياه أماني وأحلام ،
وقالوا الدنيا تطوَّرَت كثير ،وصارت الحياه كمبيوتر ، كل إشي فيها أرقام .
رُحِت عَ المتحف الشعبي ، أطفي شوق شعلب في قلبي ،
أدَوِّر عَ حالي ، تحط إيدي عَ أوجاعي ،
بلكي الدوا في غبّرَة الماضي ،
يا ما لاقوا الذهب ، في الوحل والسخام .
وقفت قدام صوره ، مزينه بالعز والافتخار ،
صبيه فلاَّحه بثوب مطرز


عَ راسها قذله مدندشه بريالات ، نازله تعبي ميه ،

حامله عَ راسها جرّة فخار،


وقفت قدامها زمن ،

طويل ؟ ..قصير ؟ .. ، ما بعرف كيف لف ودار !!

ظليت أستنى تحاكيني ،

بكلمه ... ، بحرف... ، بهمسه... ،

تعبت وأنا استنى ، ونسيت إنها اللي قدامي ،

شقفة حجر ملبسه بثوب مطرز ، وجرة فخار ،

صنم واقف ، ما فيه حياه ، كأنه بقول :

أنا الماضي ، أنا الزمن الغابر ، أنا تراب وحّجار .

*****

يا حامله الجرّه شفتك في المتحف الشعبي ،

مثل القمره ، محبوسه مثل الكنار ،

آخ يا قلب من ها لدنيا ، ضاقت عليك هلقدِ !!

وصرت شقفة آثار !!

وصرت لمّا أشتاق أشوفك ،

أدفع بريزه ، واندحش بين الزوّار ،

زغرتي يمه !!!

صرنا ندفع مصاري ، ونتفرَّج عً الفخار !!

عَ صبيه مثل القمر ، صارت حلم بعيد ،

حلم بيناتنا وبينه فيلفي وقفار ،

قلب بحن لمّبَارح ،

شوق بهب فيه ، لهب ، جمر ونار ،

ساق الله يا يمه لما بقى زمان وبقينا زغار ،



ساق الله عَ أيام الخبيزه والزعتر ،

وفتة عدس ، وصحن رصيص وبصل قنّار ،

وحلم مثل الضوّ يحيي جوّاتنا أمل ،

وميجنا وعتابا وسحجة سُّمّار ،

وشربة ميه مثل البوزه من إبريق الفخَّار ،

ومثاغاة الغنم مرّوحه من المرعى

والمرياع ملزق بالحمار .

ساق الله يا يمه قبل ما صرنا أفنديه

وصار كل إشي يجينا في المواسير ،

وبكبسة زر بنظوي الدار ،


ساق الله يوم بقينا نزرع ونقلع ،

والشلن بقى أبرك من الدينار .

بقت الدنيا دنيا ، والناس ناس ،

والحب مثل لهبة النار

صار الحب مصالح ، وصار السلام مصالح ،

وبطل الجار يعرف الجار ،


يا أسفي عَ الدنيا يا صبيه ،

يا واقفه في المتحف ، حاطّه عَ راسك جرّة فخار ،

دنيا صار الإنسان رخيص ، صار العرض ما بيسوى

وصار متخلف ورجعي اللي بعرف العيب وبغار ،

صارت الحياه قرش ، معك قرش بتسوى قرش ،

ما معك روح إندّار .

*****



يا حامله الجره شفتك في المتحف الشعبي ،

مثل القمره محبوسه مثل الكنار ،

سمعت صوت بقطم بلحمي ، بحز عظمي بمنشار ،

اشتقت أشوفك برّات المتحف ،

إشتقت أشوفك عَ طريق العين ،بتتمايلي مثل عود الند ،

كلك دلال ورقه ، كلك حلاوه وبساطه ،

مثل ورق الدفتر لِبْيَض ، ما فيك عُقَد ولا أسرار،

شوفة وجهك بتبعث الأمل بقلب كبر الحزن فيه ،



بحلم بشمة ريحانه ، بشوفة حنّونه ،

عَ وجه الأرض ، مثل دم الزغلول ،

بلعب الهوا فيها ، مرّه يمين بتميل ، ومرّه يسار ،

بقلب يحلم مرَه يضحك ، بفرح مثل النبع يفيض فيه ،

يحس الفرح ولو مرّه ، من غير مجامله ،

بس الفرح !!!! يا كشل عَ الفرح !!!

صار مثل الذهب وزن وعيار ،

وبطل يتلاقى في السوق ،

الظاهر صاروا يخبوه التجار ،

ليوم يموت الفرح ، ويشيعوه بطبله ومزمار .

******

يا حامله الجره مثل تاج الذهب ، وصارت الجره عجبة الزمان ،

وكان يا ما كان ، في غابر الدهر والزمان ،

بنيه مثل القمر ، مثل الشمعدان ،

بقت تمشور عَ طريق العين ، تعبي ميه ، تشرح القلب ،

بالثوب لمطرز ، بالأساور والتراكي والكردان ،

والقذله ونيرات العثملي ، ذهب وفضه ، مثل صف العسكر ،

مصفوفه عَ راسها من هان وهان .

بقت تقول للقمر : يا قمر ، انزل تقعد مطرحك ،

صير إنت أنا ، وأنا قمر الزمان ، خلي العشاق يحلفوا فيَّ ،

آخ .... واه... يا بيّاخ !!!

أسفي عً أيامك يا بنيه اللي راحت ، وقلعوا شروشك ،

مثل الزيتونه الروميه اللي بقت مزروعه باب الدار ،

وحطوك في المتحف الشعبي ، يتفرّجوا عليك الزوار ،

يدفعوا بريزه ممسوحه

تيعيشوا لحظه مع الحب ، مع الزمن اللي مضى

مع العمر اللي انفنى ، يوم بقى عنا صبايا ،


يوردن عَ العين يملين ميه ، حاملات جرار الفخار





الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الأحد 14 أغسطس 2011, 7:53 pm

وين ايامك يا ستي
وين ايامك يا ستى
لما بقيتي تحملي العقدة وتروحي عالبيارة عند سيدي
وايام الحصاد تغني للحصيد والمغرب لمن تتجمع الحبايب
تغنى وسيدي يغني اوووف ويكيف على غناكي يا حلوة يا ستي
واقعد على الحصيرة وعجينة اعمليلي مع مكنوشة الزيت والزعتر وكباية شاي واندهيلي تكيف عليها
وبتذكر يا ستي وبتذكر يا ستي لما بقيتي تلاقينا في الحارة واحنا نلعب في الرمل وانغني
وتقولي يا بقبق عين ستو يا بقبق عين ستو اوعا الرمل ييجي على راسك وعينتك
واه يا ستي واه يا ستى محلى زمان وحكيى زمان وسالفة زمان
وايام الولية وابو اجرين مسلوخة والشتوية والعلية يرحم ايامك يا ستى


--------------------------
سيدي وصّى بيي وبيي .. بيي وصّاني
وصفلي عنوان الدار .. بحكاية وأغاني
حلفني برب السما .. أصون الأمانة
مفتاح بيتي بيافا .. أمنّي وأعطاني
وصاني وقلي يا سيدي لا تنسوا فلسطين
حق العودة حق مقدس .. لو طالت السنين
خلي صوتك يعلى ينادي في بيوت اللاجئين
خاين كل من ساوم خاين .. لديني وأوطاني
--------------------------





خذي مني يا ستي عهد ما ينطال
خذي مني يا ستي عهد ما ينطال
امانتك بالدم تسري
ننساها ....ننساها
يا ستي محال
والله يا ستي عهد الله ياستي
لو بنو لي من الذهب القصور فوق التلال
وزرعوا الزمرد دوالي
باشكال ما تخطر على بال
وجابوا من الحرير الوانوا على مية جمل مع مية جمال
ما تساوي دعست رجلك يا ستي عشط يافا فوق الرمال
الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الأحد 14 أغسطس 2011, 7:57 pm

أنا حفيدك يا سيدي ،اللي تربيت عَ ذراعك ،
وحييت عَ أخلاقك المعهوده
أنا حفيدك يا سيدي اللي شربتك مثل الندى ،
و عَ إيدك مصيت الحليب من بوز الباروده !!!
أنا حفيدك يا سيدي ، اللي ربتني ستي عَ أمجادك العاليه ،
وخطوط فدانك عَ الوطاه تلوم مشهوده
أمجادك يا سيدي بعدك ، مهما قزّموها بتتطاول ،
وبتظل في الذاكره محفوظه ومحموده
ومهما عادوا تراث شعبنا اللي مسلع بالصخر والصفاه
ومهما نصبوا أخلاقنا عَ المشانق ، بتظلها موجوده
وبنصحى عَ صرخة الحق ، من غفوة الموت ، وبنفج مثل الفجر
حتى لو بقت منيمه عَ جنبها ، وبالخوصه مملوده
أمجادك يا سيدي بتطاول الشمس ، وسيرة ذكرها عالي
بتلاقيها عَ كل شفّه ولسان ، قصه مسروده





***************
أنا حفيدك يا سيدي اللي حب الأرض مثلك ،
اللي نهل من مناهل علمك ،
اللي رجد سنين عمرك المحصوده
وخباها في خوابي وكواير قلبه ذخيره لكل جيل
مونه للعمر وسند لسنين المحل السوده
**************


آآآه يا سيدي لو تدري شو صار من بعدك أهوال ..!!!!!
الموارس خربت ، وانتشرت في المونه الدوده
وبيوت العقد اللي خابرها كوّعت ، وصارت مهدوده
والسهول اللي بقت ذخيرة العمر انزرعت فلل وقصور
وما عادت طوابير الحمير محمله بغمور القمح المرجوده
وما عادت عنا بيادر تتنافس عليها الصرابات ،
قبل ما تنمد للطرحه مفروده
وما عادت المذاري تزغلى الطرحه اللي طابت لفوق ،
كل ما طاب هواها ، مثل أيامك المعهوده
**************


قلبي تعب يا سيدي ، وامتلت جروحي قيح ،
يا مين يداوي القلب ، وينعش دقاته المكدوده
هدنا الزمن يا سيدي من بعدك ، ونشفت مدامع ستي قد ما ذرفت
ونور الصبر والأنتظار لهفه وشوق ،
وتنثورت آمال الحلم مردوده
أنا بحبك يا سيدي ، يا فارس الخيل ، ودواس عتمة الليل ،
واتمنى لو ظليت وابقى ركاب حصانك الأدهم
اتمرمغ في تراب أمجادك المعهوده
*************


أنا حفيدك يا سيدي ، اللي قص آثار مجدك عَ التلوم ،
وشاف صورة وجهك الي عَ الجهير بعدها موجوده
أنا حفيدك يا سيدي اللي ما برضى الظلم والضيم ،
وبحارب جيوش الجور اللي عَ سنين عمرك محشوده
ومثل الذيب ما بطلع من العركه مهما جرى ،
قاتل مقتول ، مهما النتيجه تبقى مقصوده
أنا حفيدك يا سيدي ، ويا ريت قدرت أحمي أمجادك اللي بادت ..!!!
اللي هرّت مثل الدمع بعد ما سادت
وما عادت أجيال بعد جيلك مولوده ..!!!
الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الأحد 14 أغسطس 2011, 8:01 pm

شوف يا ستي ..

الدنيا إلها وجهين كبار ، دشرك من الوجوه الزغيره اللي بتفقس من هون وهناك ، وجه قباله وجه امخالفه ، مثل القرش ، كل وجه عليه كتابه غير اللي على الوجه الثاني ، بس الوجهين وجهين لقرش واحد...!!
قديش واحد بسم الله ما شاء الله عليه وعلى اللي حواليه ، خلّف واحد ما بسوى ملا ذانه بزاقه..!! ، وهذي إرادة ربنا سبحانه وتعالى ، ورده بتخلف شوكه ، وشوكه بتخلف ورده ، أو بقولوا مرّات (قرده خلفت ورده)...!!!
وقديش واحد غانم محترم وجيه خلّف ولد داشر هامل ، ساقط ، وهون بنقول : (نار وخلّفَت رماد) وبنقول (جمل وخلّف بعره)....!!!
وقديش واحد ما بسوى في سوق الزلام إشي خلّف ولد من أحسن الأولاد ، وقديش واحد قد الحيط ، بس في صدره قلب أرنب ، خويفه خُرَّعَه ، وأبوه بقى فارس ، وواحد ببقى مثل الريشه ، الهوا بطيره ، وبتلاقيه بطل صنديد ، وعندك مثال أبو السرهد وابو جلده اللي أقلقوا حياة الأنجليز ، ويوم أعدموا أبو جلده بقى يوم عيد عندهم ....!!!
وقديش بتشوف وحده بتحل عن حبل المشنقه من جمالها وحلاها ، بس بتلاقي روحها وظلها أثقل من بعضهم ، دمها ما بنزل من كربال الفول لزناخته...!!
وفي المقابل بتلاقي مجعلكه شحبوره بتدحدل قدامك مثل البرميل ، بس بتلاقي دمها خفيف ، وبتلاقيها قد ما هي دفشه نِغشه ، ومعشرها حلو ، وأي مجلس بتقعد فيه بتنشر فيه البهجه والسرور ، وما بتحب تفارقه ولا تقوم منه...!!!
وقديش يا ستي بتلاقي واحد مثل مطرق الرمان ، حقود حسود ، ظلوم غشوم النقطه من دمه بتسمم بلد ، وواحد بس يوقع نظرك عليه بتزدريه عينك وبكتم على نفسك اللي بتغيم عليك مثل نفس الوحمى ، بس ببقى طيب ، وقلبه أبيض ، ومعشره حلو ، ومجرد ما قعدت معه ذاب في قلبك مثل السكر وحبيته من كل مجامع قلبك...!!!

هذول يا ستي بَرّاهم غير جوّاهم ، واذا حكمنا على برّاهم بدون جوّاهم ، أو جوّاهم من دون برّاهم ، يا إما بنظلمهم ، يا بنعطيهم أكثر من حقهم ، وفي الحالتين ظلمناهم ...!!


النَوَّر كلهم طبالين وزمارين ، وجايز يطلع منهم خطيب متعلم ، وما إلو علاقه لا بالرقص ولا بالطبل ولا بالزمِر، ويطلع ابن اللي


تربى في بيوت العلم والحكمه تبع (هِشتِك بشتِك)..!
قديش جوهره ثمينه بتلاقيها في مزبله معفنه ، وبنت حرّه شريفه ، في بيت قايم على قلة الحيا والرزاله ، وقديش جوهره مغشوشه معلقه في صدر محل صايغ ، وبنت الله يستر على ولاياه ، في بيت كرم وأخلاق عاليه ...!!!
قديش حرامي بطلع له ولد أو أكثر شرطه بلاحقوا المجرمين والحراميه وبحطوا الصرامي العتيقه في ثمامهم ، وقديش عفيف شريف بطلع له ولد حرامي ....!!

وقالوا في المثل (بخلق من الفسيخ شراب ، وبتطلع النوّاره من الزباله) وقال المثل (البيضه البيضا بتبيضها الجاجه السودا) ...!!!
هذي الدنيا وهذا جزء من وجوهها، وكل انسان مسؤول عن سلوكه ، ومش مطلوب منه انه ينسأل عن سلوك غيره، لأنها يا ستي (كل شاه معلقه من عرقوبها)...!!!
إنت مطلوب منك تتربى مليح وترَبي مليح ، قدر طاقتك ، واذا عندك ولد منحرف ، والإنحراف رح يسيطر عليه لمّا يجنح فيه ...!!!
بس يا ستي بدك اتدير بالك ، وتراعي أحوالك ، وتحط مخافة ربك بين عنيك ، وانا حسب خبرتي واللي شفته في الحياه ، صارت عندي قناعة إنه الإشي اللي تربى البني آدم عليه ، لا بُد وانه يشده في يوم من الأيام ... فلا تيأس يا ستي وعمر السامعين يطول ، وخلي ثقتك برب العالمين كبيره وعاليه ....،
وسلامة فهمك يا ستي ،
الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الأحد 14 أغسطس 2011, 8:03 pm

عنا اليوم تنين سيد وسيد ,,عم بيخرفو ببعض وبتحاورو وبيتناقشو ,,, لأخر النزلة

بس حكيهم عجبني حبيت تتفرجو معي عهالتنين النهفات


أبو فلسطين :ألي مكتوب على الجبين بشوفه العين يا اخوي

أبو سعود : دخلك يا أبو فلسطين اشو آخر الأخبار؟

أبو فلسطين: شو بتتوقع يعني.. "أتبدلت غزلانها بقرود".

أبو سعود: مفهمتك ؟

أبو فلسطين: يعني بصراحة أعطوهم الثقة وهم ما يستحقوها خاصة هذا اللي "أجا ونام عنا ليلة وساوى حاله من العيلة"!!

أبو سعود: مش هيك ألحكي يا أبو فلسطين والزلمة لسه "ما بنعرف خيره من شره".

أبو فلسطين: أي والله لو"حبسوه مع ابليس في كيس بطلع ابليس يستغيث" هذا "زي البرد سبب كل علة".

أبو سعود: لـه يا زلمة "الحيطان الها ودان" "احنا بنمشي الحيط الحيط وبنقول يارب السترة".


أبو فلسطين: ولليش الخوف؟ أي والله " الساكت عن الحق زي الناطق في الباطل". بعدين اشو اللي بدو يصير؟ "مابصير اكثر من اللي صار" ، والمثل بيقول "النعجة المذبوحة ما يوجعهاش السلخ"..

أبو سعود: يازلمة "مش كل اللي بنعرف بنقال".

أبو فلسطين: بصراحة يا أبو سعود "اللي بعمل حاله نخالة تنقه الجاج" واللي قاعد بصير ما بينسكت عليه..


أبو سعود: شوف يا أبو فلسطين الحكاية أكبر من صاحبك. هذي يا عمي أمريكا و"حدا بقدر يقول للغول عينك حمرا" ؟


أبو فلسطين: واشو يعني أمريكا مادام المسألة بتخص هالأرض .. لأنو يا أبو سعود "اللي بفرط بأرضه بفرط بعرضه" مش قالوا "الأرض عرض " ؟


أبو سعود: معلش لكن احنا "مش قدها" و"ليش نعمل حالنا أبو علي".

أبو فلسطين: يا حبيبي " التعوير في الوش.. مافيهوش معلش".
أبو سعود: والله اشو بدي اقول "طاسة وضايعة".


أبو فلسطين: أبداً الطاسة مش ضايعة و"خيرنا مابصير يروح لغيرنا" وهذا مش خيرنا وبس هذي أرضنا بتضيع ودمنا اللي بيسيل .


أبو سعود: لكن الصحيح احنا لازم نرضى باللي قاعدين
برتبوه النا حتى لو ضاع اشي من حقوقنا لأنه "نص العمى
ولا العمى كله" وزي ما بقول المثل :"بلا أهون من بلا
والكساح أهون من العمى ".


أبو فلسطين: شوف يا ابو سعود "لاتدير قفاك للدبابير وتقول منايا وتقادير".

أبو سعود: والله يابوفلسطين أنا معك لكن بعد اللي صار في العراق شكله "الدور علينا" و"الحبل على الجرار" والمثل بيقول "طيع لاتضيع" و"خليك على مقرودك ليجيك اقرد منه".

أبو فلسطين: والله إذا بدك تطاوع الأمريكان راح تنذل وتنهان والمثل برضه بقول " الحق الغراب بدلك على الخراب" و"هذي أمريكا وهذي بلاويها" .

أبو سعود: يا عمي "اللي ما إنت طوله لاتطاوله" و"هذا الحكي ما بجيب خبز" لكن أمريكا يمكن تجيب النا شوية خبز!

أبو فلسطين: والله "عشم ابليس في الجنة" ويا "طالب الدبس من ذيل النمس" و"إذا كنت نسيت بأذكرك" وعلى رايهم "إذا كنت نسيت اللي جرى هات الدفاتر تتقرا" وانت نفسك شفت شو عملوا في العراق و"اللي بياكل رغيف الظالم بحارب بسيفه" بتقبل تكون هيك يا بوفراس؟

أبو سعود: أنا ما بقول نتخلى عن حقنا لكن "بالتي هي أحسن".

أبو فلسطين: يا بوسعود إحنا اصحاب حق و"الطلب الهين بيضيع الحق البين" و"الحق اللي وراه مطالب مابيموتش".

أبو سعود: بس خلينا نجرب "لعل وعسى"، بعدين "زمان أول تحول" ويمكن انو أمريكا تغير من سياساتها لصالحنا هالمرة.

أبو فلسطين: والله يا ابو سعود "اللي أصله ........لازم ينبح" و"وين ما بقعد بنجس" و"اللي فيه طبع ما بغيره" وبصراحة انت باين الخوف قاتلك والخوف زي ما بقولوا "قطاع الركب".

أبو سعود: وانت لارضيت بمدريد ولا بأوسلو وإجا اللي أسخم منهم وهذي خريطة الطريق ومش عاجباك صراحة "انت مابعجبك العجب ولا الصيام في رجب".

أبو فلسطين: أنا والله بانصحك لكن الظاهر انو "اللي بينصحك زي اللي بيرصعك".

أبو سعود: على العموم " اللي بيجري على الناس بيجري علينا" والمثل بقول "حط راسك بين هالروس وقول يا قطاع الروس".

أبو فلسطين : كل اللي بدي أقوله "داوي جرحك مليح لابيدمي ولا بقيح" واحنا دوانا بها الجهاد المبارك والمقاومة بكل شارع وطريق مش بالجبن والخوف والجري ورا خرابيط الطريق !!
أبو فلسطين :ألي مكتوب على الجبين بشوفه العين يا اخوي

أبو سعود : دخلك يا أبو فلسطين اشو آخر الأخبار؟

أبو فلسطين: شو بتتوقع يعني.. "أتبدلت غزلانها بقرود".

أبو سعود: مفهمتك ؟

أبو فلسطين: يعني بصراحة أعطوهم الثقة وهم ما يستحقوها خاصة هذا اللي "أجا ونام عنا ليلة وساوى حاله من العيلة"!!

أبو سعود: مش هيك ألحكي يا أبو فلسطين والزلمة لسه "ما بنعرف خيره من شره".

أبو فلسطين: أي والله لو"حبسوه مع ابليس في كيس بطلع ابليس يستغيث" هذا "زي البرد سبب كل علة".

أبو سعود: لـه يا زلمة "الحيطان الها ودان" "احنا بنمشي الحيط الحيط وبنقول يارب السترة".


أبو فلسطين: ولليش الخوف؟ أي والله " الساكت عن الحق زي الناطق في الباطل". بعدين اشو اللي بدو يصير؟ "مابصير اكثر من اللي صار" ، والمثل بيقول "النعجة المذبوحة ما يوجعهاش السلخ"..

أبو سعود: يازلمة "مش كل اللي بنعرف بنقال".

أبو فلسطين: بصراحة يا أبو سعود "اللي بعمل حاله نخالة تنقه الجاج" واللي قاعد بصير ما بينسكت عليه..


أبو سعود: شوف يا أبو فلسطين الحكاية أكبر من صاحبك. هذي يا عمي أمريكا و"حدا بقدر يقول للغول عينك حمرا" ؟


أبو فلسطين: واشو يعني أمريكا مادام المسألة بتخص هالأرض .. لأنو يا أبو سعود "اللي بفرط بأرضه بفرط بعرضه" مش قالوا "الأرض عرض " ؟


أبو سعود: معلش لكن احنا "مش قدها" و"ليش نعمل حالنا أبو علي".

أبو فلسطين: يا حبيبي " التعوير في الوش.. مافيهوش معلش".
أبو سعود: والله اشو بدي اقول "طاسة وضايعة".


أبو فلسطين: أبداً الطاسة مش ضايعة و"خيرنا مابصير يروح لغيرنا" وهذا مش خيرنا وبس هذي أرضنا بتضيع ودمنا اللي بيسيل .


أبو سعود: لكن الصحيح احنا لازم نرضى باللي قاعدين
برتبوه النا حتى لو ضاع اشي من حقوقنا لأنه "نص العمى
ولا العمى كله" وزي ما بقول المثل :"بلا أهون من بلا
والكساح أهون من العمى ".


أبو فلسطين: شوف يا ابو سعود "لاتدير قفاك للدبابير وتقول منايا وتقادير".

أبو سعود: والله يابوفلسطين أنا معك لكن بعد اللي صار في العراق شكله "الدور علينا" و"الحبل على الجرار" والمثل بيقول "طيع لاتضيع" و"خليك على مقرودك ليجيك اقرد منه".

أبو فلسطين: والله إذا بدك تطاوع الأمريكان راح تنذل وتنهان والمثل برضه بقول " الحق الغراب بدلك على الخراب" و"هذي أمريكا وهذي بلاويها" .

أبو سعود: يا عمي "اللي ما إنت طوله لاتطاوله" و"هذا الحكي ما بجيب خبز" لكن أمريكا يمكن تجيب النا شوية خبز!

أبو فلسطين: والله "عشم ابليس في الجنة" ويا "طالب الدبس من ذيل النمس" و"إذا كنت نسيت بأذكرك" وعلى رايهم "إذا كنت نسيت اللي جرى هات الدفاتر تتقرا" وانت نفسك شفت شو عملوا في العراق و"اللي بياكل رغيف الظالم بحارب بسيفه" بتقبل تكون هيك يا بوفراس؟

أبو سعود: أنا ما بقول نتخلى عن حقنا لكن "بالتي هي أحسن".

أبو فلسطين: يا بوسعود إحنا اصحاب حق و"الطلب الهين بيضيع الحق البين" و"الحق اللي وراه مطالب مابيموتش".

أبو سعود: بس خلينا نجرب "لعل وعسى"، بعدين "زمان أول تحول" ويمكن انو أمريكا تغير من سياساتها لصالحنا هالمرة.

أبو فلسطين: والله يا ابو سعود "اللي أصله ........لازم ينبح" و"وين ما بقعد بنجس" و"اللي فيه طبع ما بغيره" وبصراحة انت باين الخوف قاتلك والخوف زي ما بقولوا "قطاع الركب".

أبو سعود: وانت لارضيت بمدريد ولا بأوسلو وإجا اللي أسخم منهم وهذي خريطة الطريق ومش عاجباك صراحة "انت مابعجبك العجب ولا الصيام في رجب".

أبو فلسطين: أنا والله بانصحك لكن الظاهر انو "اللي بينصحك زي اللي بيرصعك".

أبو سعود: على العموم " اللي بيجري على الناس بيجري علينا" والمثل بقول "حط راسك بين هالروس وقول يا قطاع الروس".

أبو فلسطين : كل اللي بدي أقوله "داوي جرحك مليح لابيدمي ولا بقيح" واحنا دوانا بها الجهاد المبارك والمقاومة بكل شارع وطريق مش بالجبن والخوف والجري ورا خرابيط الطريق !!

وهيك خلصو وكل واحد راح عدارو ,, وبعدين ما حد حكالي شو صار معهم ,,






المهم يا شباب مين راااســو مأوجعوش فيكم ؟.

الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الأحد 21 أغسطس 2011, 12:27 pm

الله يرحم ايامك يا ستي ...



الله يرحمك ويرحم أيامك يا ستي يوم كنت تجمعينا من اصغر صوص لأكبر شنب وتقعدي تحكي لنا قصص وخراريف أيام زمان قصص اللي يا خوف خوفي أنها تكون الأرض طوتها تحتها مع من طوت ومع الأيام اللي بتمر تصير ورقة خريف في الهوا طايرة.
قصص وأشعار عن أبوزيد الهلالي اللي كان برفعة سيف يجندل تحت رجليه أربعين زلمة وكل زلمة ظهره قد الحيط.
ونقعد نحنا الصغار نحلف ونتحلف بأنه لو صبرت علينا الدنيا وكبرنا لنعجب العجب زى أبو زيد وأكثر.
خرافية الغولة أم أربع عيون اللي لما كنتي توصفيها النا كنا نسحب جعدة الخروف ونتخبى تحتها أكثر تا تحمينا الجعدة من الغولة ومن برد الكوانين.
قصة الولد الشاطر أبو نص نصيص ومغامراته مع الغولة اللي كانت ناوية تهد بيته وتسحبه من تحت الحجار وتوكله هي وبناتها من غير ملح وكيف أن أبونص انصيص طلع اشطر من الغولة وضيع عليها الوليمة.
ولا قصة جبينة البنت الحلوة اللي جابتها أمها بعد ثلاثين سنة عقم و بالحبل توحمت الأم بقرص جبنة بيضا ولما ولدتها جابت بنت زي فلقة القمر بس على جبينها طبعة زي قرص الجبنة البيضا.
و قصة الشاطر حسن الحرامي اللي تاب و صار قاضي بلد.
و غيرها غيرات من الخراريف اللي ألها أول ما ألها آخر.
الله يرحمك يا ستي بعدد ذكر الأمثال اللي كنت تنصحينا دايمان وحسب الحالة ومعنى المثل تقولي الكلمة اللي تغني عن كل الكلام و الحكمة اللي بتلخص كل المواقف.
واقعد أنا أيام وليالي أفكر بمعاني ها الأمثال
أفكر بالحاجة اللي حفرت وعلى رأسها عفرت و اضحك عليها و على هبلها لأنو لو أنا حفرت كان عفرت كل اللي حواليي وأنا اطلع زي الشعرة من العجين خفيف نظيف.
أما وقت الزعل علي تفتح ستي جعبتها عن المخبى من المثال وبصير أنا ما بنفع لا بخل ولا بنبيذ، وما بسوى ملا ذاني نخالة والحمد لله انو ربك بستر وبلطف وان الحاجة الختيارة بتنسى وبترضى بسرعة وتصير تنادي علي اطلع من مغارة الأرانب اللي كنت اتخبا فيها من غضب وزعل الكبار مين ما كان يكونوا وتصير اتطعميني من خبز الطابون الطازج مع السكر وزيت الزيتون وتحكي عن ايام زمان وعن سيدي اللي كان مخوف نص البلاد بقوة ساعده وفروسيته وانو كان يضرب عين السنجاب طلق عن بعد جبلين وهان تلعب الأمثال دورها الايجابي الصالح وبصير انا فرخ البط عوام وبتتركني أفكر ساعات بها المعضلة الصعبة انو شو شبه البط لي ولا سيدي وكيف بدي اعوم وأنا أصلا ما بعرف اسبح.
وترجع الحاجة تنصحني انو امشي الحيط الحيط ولا تكون زي اللي كسر مزراب العين: واقعد انا الحق ستي واحاول افهم منها مين هو هادا اللي كسر المزراب وليش كسرو وشو بدو فيه,ولو انا محلو كان اصلا ما غلبت حالي بكسر المزراب وكان رميت حجر كبير يسكر على الناس المي ويمنع عنهم العين.
وكبرت انا وكبرت معي معاني الامثال والحواديت وصرت أخاف عليهم من غدر الزمان وانهم يموتو ويروحو مع ستي رحمة الله عليها
الرجوع الى أعلى الصفحة اذهب الى الأسفل
سناء
الإدارة
الإدارة
avatar

انثى عدد المساهمات : 1176
الرصيد : 1611
أعجبني : 39
تاريخ التسجيل : 11/12/2010
العمر : 28
العمل/الترفيه : طالبة جامعية
رقم العضوية : 306

مُساهمةموضوع: رد: يرحم ايام زمان أكبرنا مساحه خاصه ل ستي وستك    الخميس 25 أغسطس 2011, 9:55 pm

مشان عيونك وعيون الناس اللي بتحب خراريف ستي وبس

كان في غولة شريرة و إخوة واحد اسمه اسكينون و واحد اسمه نخيلون و واحد اسمه حديدون "


اسكينون بيته من سكن (رماد) ... و نخيلون بيته من نخل... و حديدون يا حزركم شو ؟؟ صح من حديد ..
كانت الغولة تيجي وتحكي :
اسكينون ... تطلع وللا أنفخ عليك وأوكلك ..
اسكينون بحكي : انفخي تا ينقطع نفسك ..
فنفخت الساحرة وطار البيت من االسكن وأكلت اسكينون

تاني يوم أجت عند نخيلون
وقالت : نخيلون .. تطلع وللا أنفخ عليك ؟
يجاوبها : انفخي لينقطع نفسك ..
فنفخت الغولة وطار النخل وأكلته

صفي حديدون لحاله

أجت عنده الساحرة وقالت :
حديدون ..
قالها : علة وطاعون ..
قالت : تطلع وللا أنفخ وأوكلك ؟؟
قالها : انفخي يا غولة
نفخت الساحر وصار وجهها أحمر وانقطع نفسها .. و ما صار شي لبيت حديدون الحديدي

المهم ... ضلت الساحرة الشريرة تفكر بطريقة توكل فيها حديدون .. لبين ما لمعت ببالها فكرة

قالت لحديدون : في عرس تروح معي ؟؟
قالها : ما بدي ..

راحت الشريرة لحالها .. بس حديدون.. كان عارف الدرب القصيرة وسبق الشريرة للعرس .. وأكل الرز كلو .. وأكل اللحم وصار يرمي العظام على الشريرة .. ولما عطشت شربها " كان متنكر " ماء ... وكان مش زاكي ... وروح ع بيته قبلها ..

انقهرت لإنها ما أكلت بس لما رجعت عملت حالها مبسوطة وبتحكي لحديدون راح عليك نص عمرك .. العرس بجنن والأكل زاكي ..
قالها : يا كدابة .. أنا كنت هناك قبلك وأكلت الأكلات ورميتلك العظمات وشرّبتك ماء كنت مغسل إيدي فيه ..
انقهرت لأنو فلت منها ورجعت ع بنتها " كريعونة " يفكروا بخدعة تانية ...

تاني يوم قالتله : في مزرعة بطيخ كبير تورح معي ؟؟
قالها : بديش جميلتك
وكالعادة .. سبقها بالدرب القصير وأكل كل البطيخ .. ولما حس عليها وصلت لبس قشرة بطيخة ع راسه وبينوا أدانيه
فالساحرة اطلعت وقالت أول مرة أشوف بطيخ إله أدانين وروحت وهي جوعانة .. وهو روّح قبلها .. بس عشان تجاكر حديدون قالتله راح عليك هالبطيخ الحلو الأحمر .. قالها : كدابة .. كنت هناك وأنا أكلته كلو ... و من هبلك فكرتي للبطيخة في أدانين
اقهرت ورجعت عند كريعونة بنتها .. وحطوا فكرة جهنمية ...

كان حديدون يروح يوقف عند بابها يجاكرها ويقاهرها .. ولما تطلع يهرب منها ع بيته الحديدي ..
فقررت تحط صمغ ع الأرض ..
أجا حديدون .. وقعد يقاهرها .. ولما طلعت ما قدر يهرب لأنه لزّق
حطّته الشريرة بشبكة وقالت لكريعونة : بدي أروح أعزم خالاتك وعماتك على حديدون ونعمل حفلة .... و عوقت الغدا بتطبخي ع راسه منسف أخو شلن...

طلعت الغولة تعزم الحبايب ... و حديدون عارف كريعونة طالعة غبية لإمها .. فصار يعمل حاله بعلك " علكة " وصار يحكي : علك أحمر .. علك أصفر .. زاكي زاكي ...
كريعونة صار بدها علكة ..
قالتله : أعطيني علكة .. قالها ما بقدر إيدي مربوطين ببعض فكيهم ...
والهبلة فكّتهم
نط حديدون زي الأسد وحبس كريعونة ...
وطبخها هيّ ... وأخذ شعراتها دليل وحطهم بالطاقة اللي في البيت ...
ولما أجت الساحرة وقرايبها ..
اطلعت عالرز وصارت تحكي الراس راس كريعونة ... بس صارت توزع اللحمة عالناس و أكلو وشبعوا ...
ولما خلصوا .. نط حديدون وقالها : نا نا نا نا .. أكلتي بنتك .. وإزا مش مصدقة روحي شوفي شعرها ..
ولما شافت الشريرة شعر بنتها انجلطت وماتت وارتاحوا الناس من شرها ..

وتوتة توته خلصت الحدوتة .. حلوة وللا ملتوتة

الرجوع الى أعلى الصفحة اذهب الى الأسفل
 
يرحم ايام زمان أكبرنا مساحه خاصه ل ستي وستك
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة بيت الذاكرة الفلسطينية :: .:: منتدى بيت الذاكرة الفلسطينية ::. :: قسم التراث الفلكلور الفلسطيني-
انتقل الى: